Пасажыры рэйса «Белавія» з Мінска ў Кутаісі прыбылі ў пункт прызначэння з 12-гадзіннай затрымкай праз экстранную пасадку ў расійскай Астрахані. Пра гэта паведаміў тэлеграм-канал пра авіяцыю «ОтВинта».
Пасадка ў Астрахані, нагадаем, была выкліканая адмовай рухавіка нумар 2. Капітан паветранага судна папрасіў пра зніжэнне, абвясціў сігнал тэрміновасці і прыняў рашэнне прызямліцца на незапланаваным аэрадроме.
«Днём у Грузію пасажыраў дастаўляў ужо іншы борт Embraer E195LR (рэгістрацыйны нумар EW-514PO). У выніку яны прыбылі ў Кутаісі з адхіленнем ад раскладу больш чым на 12 гадзін», — піша «ОтВинта».
У каментары выданню іншы капітан паветранага судна адзначыў прафесійныя дзеянні экіпажа «Белавія».
«Зразумела, мае месца сур’ёзны інцыдэнт. Сур’ёзнейшы, чым шына ў Boeing 737 MAX 8 Belavia ў лістападзе мінулага года, якая лопнула падчас узлёту. Бо калі адмаўляе рухавік, рэзка зніжаецца парог рэзервавання, што прыводзіць да пэўных зменаў у тэхніцы пілатавання. А кола лопнула, ну і чорт з ім, на „вазку“ яно не адзінае», — адзначыў суразмоўца.
Пілот падкрэсліў, што пасля адмовы аднаго рухавіка з 2−4 узнікае эфект «асіметрычнай цягі, які можна пагасіць невялікім нахілам ці слізгаценнем».
«У пасажырскім салоне многія востра не адчуваюць нейкіх зменаў у канфігурацыі палёту. Хіба што трохі змяняецца гук (тон) дзейных рухавікоў. Калі адмаўляюць усе рухавікі, горды лайнер ператвараецца ў банальны планёр (не кожны пілот мае досвед пілатавання планёра і можа разгубіцца ў такой сітуацыі, але парадак дзеянняў адпрацоўваецца на трэнажорах) і пачынае зніжацца з пэўнай хуткасцю і вуглом зніжэння. Бяспечная пасадка ў гэтым выпадку вельмі малаімаверная. Успомніце выпадак з Ту-154 гадоў 15 таму, які паспяхова сеў у сібірскай тайзе з адмовай трох рухавікоў. Варыянты пасадкі з нядзейнымі рухавікамі (усімі) адпрацоўваюцца з пілотамі на трэнажорах. Можна лічыць, што пілоты гатовыя і да такога павароту падзей», — расказаў суразмоўца.