Пасля дыверсіі на вайсковым аэрадроме ў Мачулішчах на даручэнне Лукашэнкі ГУБАЗіК «актывізаваў» працу ў дачыненні да грамадзян, «датычных да дзейнасці экстрэмісцкіх фарміраванняў і тэрарыстычных арганізацый». Пра гэта паведаміў 10 сакавіка начальнік аддзела ГУБАЗіК МУС Яўген Пілецкі.
Паводле яго словаў, сілавікі шукаюць «таемныя ячэйкі экстрэмістаў і іх памагатых, у тым ліку тых, хто фінансуе злачынную дзейнасць супраць Беларусі».
— Да супрацоўніцтва з тэрарыстамі, як правіла, гатовыя звязаныя з наймітамі асобы і ўдзельнікі экстрэмісцкіх фарміраванняў, напрыклад, плана «Перамога». Кропкава спыняецца дзейнасць актывістаў і ўнутры краіны, якія распальваюць варожасць у інтэрнэце, — даў справаздачу Пілецкі.
Толькі за ўчора супрацоўнікі ГУБАЗіК «адпрацавалі» больш за 60 чалавек. 21 з іх прыцягнуты да адміністрацыйнай адказнасці і пяцёра — да крымінальнай.
У МУС папярэдзілі, што ў анлайн-рэжыме яны «адсочваюць інфармацыю, якая публікуецца ў экстрэмісцкіх чатах, і аператыўна выяўляюць зламыснікаў, пастаянна аналізуюць актыўнасць удзельнікаў дэструктыўных ініцыятываў».
— Калі за два з лішнім гады хтосьці не адмовіўся ад намеру на дэстабілізацыю абстаноўкі ўнутры краіны і чакае такой каманды з-за мяжы, то можам з упэўненасцю заявіць, што ён будзе прыцягнуты да ўстаноўленай законам адказнасці, — запэўніў Пілецкі.