У Ваўкавыскім раёне працягваецца «хапун». Да чатырох затрыманых, пра якіх набліжаны да ГУБАЗіК тэлеграм-канал паведаміў учора, дадалося яшчэ столькі ж жыхароў рэгіёна, пра якіх стала вядома 28 верасня.
У «пакаяльных» відэа людзей прымусілі прызнацца ў распаўсюдзе «экстрэмісцкіх» матэрыялаў, а таксама ў рэгістрацыі ў чат-боце «Перамога». Як піша праваабарончы цэнтр «Вясна», сярод затрыманых аказаліся супрацоўнікі «Беллакта», а таксама намеснік галоўнага ўрача санаторыя «Пралеска».
Раней набліжаны да ГУБАЗіК тэлеграм-канал ужо паведамляў пра затрыманні ў Ваўкавыскім раёне. Тады гаворка ішла мінімум пра чатырох жыхароў рэгіёна.
Паводле інфармацыі праваабаронцаў, актыўнасць сілавікоў у Ваўкавыскім раёне звязаная з інцыдэнтам, які днямі адбыўся ў раённым цэнтры — на адным з выклікаў (бытавы канфлікт, не звязаны з палітыкай) быў збіты супрацоўнік міліцыі.
«Пасля гэтага ў горад адправілі сілавікоў з Мінска і Гродна, якія пачалі „зачыстку“», — удакладнілі ў «Вясне».