Раптоўнае з’яўленне новага кітайскага чат-бота DeepSeek выклікала глабальны абвал на IT-рынку, больш за ўсіх пацярпела яшчэ нядаўна самая дарагая кампанія ў свеце Nvidia. Цяпер інвестары пачалі сумнявацца ў тым, што лідары рынку штучнага інтэлекту (ШІ) сапраўды каштуюць так дорага і змогуць захоўваць сваё даміноўнае становішча, піша Reuters.
21 студзеня найбуйнейшы вытворца чыпаў Nvidia, які стаў сімвалам буму ШІ апошніх гадоў, быў абвешчаны самым дарагім брэндам у свеце з рынкавай капіталізацыяй у 3,45 трыльёна даляраў і пацясніў Apple. Але ўжо 27 студзеня яго акцыі абваліліся адразу на 17%, што прывяло да рэкорднага зніжэння рынкавага кошту на 593 млрд даляраў. Гэта стала найбуйнейшай аднадзённай стратай для якой-кольвек кампаніі ў гісторыі.
Прычынай перапалоху стаў запуск новага бясплатнага ШІ-асістэнта ад кітайскага стартапа DeepSeek. Гэтая мадэль, якая спажывае менш магутнасцяў і каштуе значна танней за аналагі, выклікала ажыятаж ва ўсім свеце. Некаторыя эксперты пакуль настроеныя скептычна да навінкі, але кіраўнік OpenAI (распрацоўшчык папулярнага чат-бота ChatGPT) Сэм Альтман ужо прызнаў кітайскую мадэль «выбітнай» і адзначыў, што з’яўленне новага канкурэнта натхняе на далейшае развіццё.
Поспех DeepSeek выклікаў абвал акцый і іншых тэхнагігантаў ва ўсім свеце. Асабліва моцна пацярпелі кампаніі з Японіі. Так, акцыі Advantest, вытворцы абсталявання для тэставання чыпаў і пастаўшчыка Nvidia, абваліліся на 10%. Tokyo Electron, вытворца абсталявання для вытворчасці мікрасхем, і SoftBank, буйны інвестар у тэхналагічныя стартапы, страцілі па 5%.
На іншых рынках сітуацыя падобная: у ЗША акцыі Broadcom абваліліся на 17,4%, Microsoft — на 2,1%, а Alphabet (матчына кампанія Google) страціла 4,2%.
Эксперты адзначаюць, што прычынай такога моцнага абвалу на рынку стала спалучэнне адразу некалькіх фактараў: агульная пераацэненасць акцый кампаній ШІ, высокая канцэнтрацыя інвестыцый у гэтай галіне і рост рызык. У апошнія гады капітал актыўна запампоўваецца ў тэхналагічны сектар, што штучна «задзірала» яго кошт. З’яўленне DeepSeek стала сігналам, што перспектывы ШІ, магчыма, былі пераацэненыя, адзначае агенцтва.
Акрамя таго, прарыў DeepSeek, адносна недарагога стартапа з горада Ханчжоу, перавярнуў ўяўленні пра тэхналагічнае адставанне Кітая ў галіне ШІ. Японскі міністр лічбавізацыі Масаакі Таіра адзначыў, што кітайскія мадэлі ШІ аказаліся значна больш эфектыўнымі і канкурэнтаздольнымі, чым чакалася. Нават прэзідэнт ЗША Дональд Трамп назваў гэтую падзею «сігналам трывогі» для заходніх кампаній.